Bye Bye‧退休人士的樂園

快要離開了，原來已在這兒兩年多，是我停留得最久的工作。這些年來大部分時間
都是開心的，總括來說就是無工作壓力地hea，認識了好同事A & C，還有遇到
仔，一個在我生命中很重要的人。得到很多marketing經驗、與一班好人到爆的同
事；失去那種隨時準備上戰場（人事關係啦、爭取表現之類）的衝勁，換來穩定得
像政府工的環境，其實沒有什麼不好，如果我結了婚或準備退休的話。

要走，是為了前（錢）途，想轉環境，想嘗試工作周圍飛而不用跑（個人）數，想
擴大生活圈子，希望有機會遇到對先生。有十萬個理由想走，都是因為在這裡快要
悶死，又重回那時在匯豐工作每朝早起身想請病假的感覺，就差不多是時候了。新
工作很challenging，全新的行業及工作性質，有點怕但有更多的期待…

這就是我的工作位置啦，超整齊（因為大部分雜物已棄掉或搬了回家），正用word
打blog。帶走很多美好回憶，另留下Postpet風扇送給燥底的A同事，嘻~~~~

等。發呆。讀書

完全唔productive的一天。

比原定時間早了起來，超眼瞓，餅又整唔切，要知道我是女人要花時間搞下個樣先出得街。一個鐘內焗餅梳洗加埋化妝已經好快了，因為內疚所以買齊野再追出去。又因為關了手機不知我在等那亦ＯＫ，反正預左等帶埋書睇。我要證明自己有耐性等人，並非每次都扮大牌要人等。。。雖然最後都是未能親手交給對方。

我有點嬲的是，為何次次都隨意更改計劃呢？太ad-hoc我是不行的，要知道平日自己的time management已經唔多好，改時間地點行程又要即刻打亂晒原定schedule去配合，我要多點時間準備。不過看來他都不會明白的了，要有主見又性急的人了解及體諒mei more人如我，還是算了。何況已經不是第一次，估計他以前的女友一定很就他。

意外收獲係，原來英文書（厚，非小說類）我亦可以一口氣看完，前後只花了４小時。

近況。１１月總結

快變成每月一blog了。提不起勁+懶，又沒有很想記下的事。本月大事有：

* 11月初與仔入長洲玩了兩天，遊客勁多，住的酒店比想像中好，喜歡伴著海浪聲
入睡。不斷食食食，串串薯片完全唔掂，還有東灣的沙粗到可當磨沙；

 * 好友阿Da結婚，個婚禮竟然有logo（A&F），好好笑！整日都很開心，雖然要彈
wedding march，成日著長裙pk過無數次，不過總括來說覺得自己化行妝都可以好
索，嘻嘻~~
呢個B真係超得意，型過晒所有兄弟呀

*終於confirm了新工作，人工有少少出入但可接受。全新的行業，要frequent
travel。有擔心，但有更多期待。。。。謝謝仔的幫忙，我會很掛念你。長途電話
費將會很貴呀，我地多d用黑莓聯絡啦，番工都要繼續send email俾我

另開始對影相有興趣了，真正的愛上LX3，暫無意欲換其他相機，除了Ricoh
GXR。係好靚好型好方便，但一部機仔要過萬蚊，發左達先會買囉。

想念你(上班時的無聊時間)

期待與你下班後見面，即使只是短短數分鐘。拍拍你的頭，碰碰你的臉，還有一個擁抱。喜歡與你談天說地，不過真的要早點瞓，這幾天在公司眼瞓到要“吉大脾”了

由10月中寫到11月頭。記事

原本應該開開心心同朋友在韓國賞楓怒買浸溫泉，因為偉大的老板一句「驚住」唔夠人手，結果假唔批，呢幾日在公司hea住發mo。錢俾晒（因為guilty仲要俾埋朋友果份），俾人嬲我成世可能永遠冇左個朋友，噢，還有無啦啦智慧齒迫到隻大牙lup左要即刻開刀，公司dental claim晒，又要駛錢。。。發生咩事呢？要我破產財散才安樂嗎？*********************************************************************
謝謝A小姐誠邀我去黑色迪迪尼。感覺與上年分別不大，玩晒所有鬼屋，又霸了靚位看煙花。很好玩的一天，謝謝好友A。（煙花照片後補）*********************************************************************
狂見工，不是人工差一點，就是有朋友報料見工的公司有問題，有offer都要turndown。可能今年又要在此crap crap公司過聖誕了，灰過灰燼。原本因為仔找到新工而開心，但似乎與想像的有很大出入，要到何時才能見到仔真正的笑容呢？看到愛的人快樂，會比自己找到新工作更開心，我是如此想的。*********************************************************************
11月了，今天在街上感受到點點秋意，特別想與喜歡的人牽著手散步去。週六會與你吹海風踏單車，期待與你親密地細說心事。每一通電話，正經的無聊的開心的傷心的，我們都好像有說不盡的話題。喜歡你談理想時的樣子，那才是真正快樂的你。有時想，如果我們可以一直這樣，又如果，我們以更親密的身份相處下去，那該有多好？但我們都不是貪心的人。愛，可以分不同層面，我們這種不是愛得不夠，而是太愛了，知道什麼才是對方最大的幸福。。。。

能維持現狀，做你心靈上的伴侶，那亦很好。親愛的，你也是如此想吧？

有人會比我更黑嗎?

人生最灰莫過於人老、錢冇、男人又冇、打份shit工轉極都轉唔到、俾晒錢去旅行突然唔批假要俾埋個frd果份都唔知佢仲要嬲我幾耐。最shit既係，未買旅遊保險所以取消行程冇得claim。我不是下年才犯太歲嗎？是不是提早於10月開始了？運氣差到可能去得成個trip都會墜機囉，一定是天主懲罰我冇去聖堂，嗚嗚~~~今個星期日會乖乖去的，我知錯了，不要再破財了~~~

冇得買新衫、日日都响公司食lunch、一星期只出街食兩次晚飯每餐唔超過港幣50元、wkend唔出街、2010 HK Art Festival只係買一場表演、Facial package用晒唔買、唔join dancing class，唯一娛樂係做運動減肥（只限免費既項目）。。。我可以生存到月尾嗎？？？L你可否請我做賓賓幫補下？

因了解而(更)喜歡

過了一個愉快的週末。

每次與朋友仔相處，都好像認識到他不為人知的一面。相比之下，活了30年的我無論思維模式到人生閱覽都是超級簡單，平淡如張白紙，生活才會無憂無累吧？他的處事方式及想法，與我過往所接觸過的真的很不同，可能是因為自己身邊的朋友多數是小康出身，背景都是專業人士沒有家庭負擔之類，我認為普通不過的事，原來對他人來說並非必然(唉~~~想唔認膚淺都唔得呀)。所以有時我不明白為何朋友仔會選擇一些另類的方式去做一件事，外人會覺得他不務實、想搏出位，總之就是評價負面。漸漸明白被人誤解，想獲得別人的認同，證明自己會成功但找不到人明白自己的痛苦。。。要走不平凡的路不是一件易事，過程中會失落，會沮喪。。。

我並不是細心的人。如果他不說，我可能會和其他人一樣誤解他。身為他的姐，只有關心是不夠的，想嘗試了解他的想法，無奈能力有限（思想簡單諗唔到複雜野），需要多些時間相處。要檢討及提醒自己不要太主觀，還有很多可以從朋友仔身上學到的事，我都要好好珍惜。嗯，有緣認識到他，引用zz名句，前世的我一定做了勁多好事！我無啦啦發小姐脾氣又陰陽怪氣玩ignore，他依然都係咁sweet，真的很喜歡這位好友。希望他新工作順利做到e-marketing達人，嗯，仲有快點找到那個可以與他分享工作成就的人（can love travel anywhere with her，嘻嘻）

雜談

很久沒有更新了，因為懶。其實這段時間有些事發生了但又不是太重要的事，無即時記下來，轉頭就提不起勁寫blog。最大問題是公司block了大量網站，所有social networking的網誌都看不到，小白又歸家無期(另一部notebook好鬼慢)，現在我上網都是以資訊性及搵工為主。新工好像轉不成了，原本諗住終於有機會轉field，做個有氣質的文藝中女啦，結果。。。做事與戀愛，都是講timing的。

Ok，just for my own record，sum up近況如下：
玩：
* 10月17 ~ 21日會去韓國，賞楓同埋買野，仲有另類目的呢，嘻嘻。
* 紫微斗數完全唔明，不過都會堅持下去。
* 為了阿Da的幸福？今個禮拜開始苦練Felix Mendelssohn的Wedding March。
*星期六的跳舞班要暫停，與攝影班撞了期。打羽毛球就要月尾才開始。
讀：
* 正在死讀之前於台灣誠品購買的攝影書，想影靚紅葉，又係有另類目的？！
* 發現書櫃內有大量書籍未睇過。Time Traveler’s Wife上左畫本書仲差個結局；How Starbucks Save My Life剛開始看覺得還可以，用字unbelievably地淺易；「消費者通識」在閱讀中，今個月會有新書「廣告101 part 2」；在重讀林夕的散文，提醒自己不要執著；還有Winifred Lai的時裝書，臨睡前重看一兩個章節，refresh對買衫的興趣。
聽:
* 延續五月天，lunch上youtube重溫他們的MV(公司還未block)；方大同的Timeless令人失望，loop了幾次已經不想再聽了，播番「橙月」好過。另會d/l陳奕迅最新的國語大碟。
* 預訂了12月Sammi演唱會的超前位置。
* 很喜歡亞洲星光大道的羅力威，好似言承旭，唔講野個樣超像！
睇:
* 最近完全沒有睇戲，對上一套已經是死神來了4。不想再看變態嘔心的戲了，要看有質素的，我是文藝中女(不過那份工已經死了，還要扮落去嗎?)。想看「心跳500天」，a story about love but not a love story，找仔還是L去好呢？
* 再次回歸外國劇的懷抱，在追看True Blood and Mad Men。
* The Magic Flute正在等A小姐確認門票。如果係非看不可的表演，還是自己買比較好。2010 HKAF又要駛錢了。

支出表不敢看。去完韓國後，直到年尾都應該是負數吧。。。我可以不吃但不能不買呀

回來了

依然好感動，番到屋企喪loop番舊碟“時光機”，全部都咁正。怪獸獨唱“九號球”，同埋彈結他左邊個台升起時個樣，型到呢.....係，係好低能，不過我覺得佢望到stage下面既我！！（當時我真係叫得最大聲果個，其他人冇我咁癲）

喜歡五月天有１０年多了，千言萬語不知從何說起。找個機會，我會記下愛上他們的起源及經過，一切皆從喜歡一個男孩子開始，“愛情的模样”是他送我第一首五月天的歌.....

在forum借了某歌迷於小巨旦拍下怪獸的照片，１０個勁！我坐警戒區守衛好嚴呀，一舉機就俾人捉到。Babe，其他的相靠晒你啦！

宅女生活

這兩天在不斷整餅中渡過。週六晚協助朋友A整芝士蛋糕；週日早上又因為發現有些材料快到期了，結果整了大量杏仁蛋白餅乾、杏仁muffin。L 說味道還可以但不夠牛油香，當然啦我是用了oilve oil代替肥爆的金三角牛油、整給自己吃的下午茶小點一定要健康d，下次才做Jenny那種口感的曲奇給L吧！

很久沒有穿得漂亮（意思是著得較elegant）去約會了。去Soho吃意大利菜，普通的mussal with white wine source配我最愛的ice wine，說說笑笑過了一個愉快的晚上。意猶未盡再往我們常去的私竇“頹廢”，談話間突然發現這種生活已經離我很遠，多久沒試過懷著期待的心情認真地約會了？L說我現在給人的感覺像不想拍拖，連買衫扮靚的意欲也沒有（真的好耐冇shopping了，開始醒覺要儲錢養老），週末只想在家看書hea下，非常宅女式的生活。情況有那麼惡劣嗎？又不是anti-social，只是提不起勁而已....工作零滿足感，法律課程決定放棄了，一下子多出的時間不知如何打發。不過L說得對，應該放假去旅行散下心，待心情好些，我會認真搵工出多d街認識多些人的。

謝謝你的禮物及晚飯，還有貼心的零食（但我在減肥喎老友）。情緒低落時吃朱古力可以開心一點，這是你最近常買朱古力送我的原因嗎？

回信

R，昨夜收到你的電郵，意外你還記得我在進修法律課程。有點點窩心，原來你還會關心我。抱歉不會回email了，因為有太多事想告訴你，怕會耐不住說我很想你。在你面前我永遠只是當年的那個小女孩，不懂得隱藏心事，我不要讓你知其實我還未放得低。即使想起的時間減少了，自以為已overcome晒，但騙不了自己，在最down想要有個依傍的身軀想有人告訴我該怎樣做的時候，第1個想到的人依然是你，L、還有仔都不能，我亦未想過有誰可取代你。有好幾次差點就要打給你，最後還是忍住了。沒有你在身邊的日子，還是會難過；與其他異性約會時，還是會寂寞。我想，總有一天會好起來吧？只要再多點時間。

這篇只是我的心情，但願你不會看到。

">

Shit爆

所有衰野seems全部爆晒出黎：(1) 海關inspector個fitness test過唔到，欠2分，雖然早知道唔得；(2) LLB又fail！！第二年重考了，決定唔讀，因為可預見就算再讀都係會fail；(3) 台灣旅行俾晒錢plan好晒，可能去唔成！！！晴天霹靂！批左假都可以臨時話要cancel，為左d妹仔做既野要stand by留港，仲冇得睇五月天演唱會，好嬲好嬲好嬲（x 10萬次）。

總結8月，一個shit字形容。

我是妖女嗎

到今天先知道朋友仔生於一個真正的火爆家族。被人痛罵的滋味，我是領教到了，說真的自出世以來我從未試過給人鬧到只是聽VM已經驚到喊，特別係一些本來對自己很好的長輩，這些話出自他們的口中真是.....(找不到形容詞）不敢想當時如果直接對話會怎樣。全無反擊之力，一點都不像平時的我，如A所說我應該冷靜地解釋而不是喊，好像真的做錯事一般（但我真的沒有做錯喎這次）。因為我影響到朋友仔與家人的關係，我覺得很對不起他們，雖然不敢說自己人見人愛，但自問一向同長輩的關係都是很好的（ex-bf的媽媽到現在仲會找我食tea的），又不長得妖性格就更不是懂得玩手段玩機心，為什麼會一下子被討厭呢？如果是因為我跟朋友仔太close了，我會留意的，畢竟她說的是事實，但真的沒必要搞到咁大鑊囉。

說到尾，家人的愛真是太偉大了。所以，我沒有生氣，因為，我們都想他過得好，我了解他家人所做的，只是想保護他而已。

親愛的，不要難過，更不要與屋企人搞對立，再咁落去，我就會成為名符其實的妖女了。You are my best guy friend. I love you still, no matter what.

事但up

* 肌肉痛死了, 這幾天行路似阿婆, 除了頸部以上尚算靈活之外
* 嗯, 吃完飯, 希望10點前到達銅鑼灣運動場跑45分鐘
* 這個星期很忙, relatives gathering仲有training.....人很倦
* 為了3萬1個月, 我會俾心機的
* 很久沒有見L了. 你若果看到, 請約我去街, 我掛住你

歡迎回來

親愛的, 辛苦了, Welcome back.

期待不久將來與穿著畢業袍的小熊, 來參加你的督察畢業禮

搵食難

見到恆記又登番份工上classified post，日期為上星期四即我要求企硬人工的當天。在商言商我明白每家機構都想用最平的價錢請到最合適的人選，如果我有信心的話，相信自己的工作經驗等各方面都絕對值得增加20%的人工，他們只會回頭找我而不是再重新登ads。是我叫價太高了嗎？I don't think so。的確這份工是挺適合我的，全是我曾做過的工種，自問兩次interview亦有超水準表現（奇怪，不是我的Dream work，又是銀行工，何況現階段在“阿爺行”還可以，只是有點悶…無心插聊下interviewer竟然勁buy我），由原本無期望變成為啖氣而希望他們會接受我的要求。但我真的喜歡那份工嗎？似乎不，唯一吸引的是錢，升職機會可能會比這兒好一點，假設夠勤力的話。銀行工真的不太想做，相反FMCG、地產之類如肯請我做marketing的話，same salary亦無所謂。看了Zoe的一句：離開自己的comfort zone，才能坦然面對自己的缺點和不足…絕對應同。再不轉行就真的轉不了，回想早些年前我轉工那會有現在這麼多顧累？人大了，幼稚如我都會慢慢懂得細想什麼最適合自己，希望選定了就長線投資下去，對工作及人都一樣。畢竟time is cost，我沒有多少時間可以浪費了。

看見仔，就像當年的我，覺得份工沒有前途十多年後搵盡最多兩皮幾一個月，就想放棄轉工去。當然他現在做的比我那時的工作辛苦十萬倍x100000！！要承受的體能訓練到心理壓力都不是一般人可以想像到（我那時的壓力只是唔到數）。其實家庭負擔不是重點，我的睇法是，至少要完成整個課程，總比試少少就放棄好，份cv亦會比較好看，將來正式on job時發現真的不適合自己才轉都未遲。

仔，經驗是需要累積的，花點時間再堅持下去好嗎？我知你很辛苦很辛苦，但冇理由人地頂得順你唔得既，我要同你影畢業型仔相呢！我深信你做那一行都可以很成功，30歲時一定比R更出色（仲要靚仔過佢好多）。其實我對你好是有私心的：第日萬一我嫁左個霉霉的老公，就要靠叻叻的你“孝順”我了。

黑

超好笑囉，因咩事冇「正常」既男人approach，反而走左件阿伯*出黎問我：你叫咩名呀？O shit！基於禮貌，我只係以一秒時間望佢一眼，嘴角微微向上(扮微笑)，跟住個頭就擰左去A姊妹果邊狂忍笑。結果野都未飲完就雞咁腳走，出左門口仲差d踏死一只肥美的小強！去HH識唔到人不特只，仲吸引晒d騎呢怪，我個look係咪真係咁唔掂呢？黑黑黑黑黑

*註：阿伯是真的阿伯，唔係吹水！地中海加大大的黑色老花眼鏡。點解我知係老花眼鏡？因為他的眼睛在鏡片下放大了。我公公生前都是戴這種眼鏡的，細個我仲成日戴住黎玩！

其實那個場是相當OK的，特別係外面area，入面太迫人了. 相中的是從IFC往外拍的中環碼頭夜景,手機嚴重地off-fo

我(們)的選擇

早前看了某篇報章散文，想說說有關“開唔開始”的問題。

與Lucas相識超過10年，感情一點一滴累積，由剛開始熱烈的追求到現在細水長流式的關懷，早已視對方為家人。大家很多時不用明言，最了解我的異性知己非他莫屬。我知道無論發生什麼事他都會在我身旁，即使他從未說過（務實派的人，做了都不會邀功的）。這些年來，儘管不常見面，我們亦各自有男/女朋友，一遇到與R有關的問題，第一個想找的人必定是L，想聽他的建議，想他對我說無問題事情會過去的......R曾經笑說我跟L的 默契比跟他更好？！是否因為不曾擁有便不害怕失去，才可以不求回報地對對方好？愛情都是自私的，如果真的開始了，大家的expectation變成對男女朋友的要求，我無把握這樣的結果會比長久的情人知己關係更適合你我。開始了而唔work的risk是回不了從前的那種關係，或可能將來會永遠失去他；不開始而保留現狀的opportunity cost是失去一個我愛他他愛我，他可用husband身份陪我到老的機會。遲鈍地在亂想一通時，L已體貼地為我設想好了：哪種關係並不重要，重要的是如何將緣份好好地維持下去。

你在我心中的位置，你是知道的，原諒我這段過渡期間的任性，暫時做我的男朋友(心靈上的)吧。

Wat da FXXX

* Being a professional, how can an in-house lawyer provide copy of company announcements which chinese and english version doesn't synchronize? I felt sorry for my IT and ebanking colleagues, who have to OT on Friday nite. And of course, I felt shit too
* Stuck in office until 11pm. Wat da FXXX!
* I've been OT for 2 weeks consecutively. Here I'm talking about leaving office no earlier than 9:30pm daily, and work during Sat and Sun.
* Really run out of energy, in bad shape, poor skin condition....so I decided to skip tmr's boat trip. I rather get some sleep and spend time with my cutie handsome charming witty little brother. I've so many things to tell him. He's been my caring listener no matter what.
* To Miss C and her friend: I'm sooooo sorry that i can't join tmr, just too tired(and M come). Since i'm the one invite you both, i'll try to bargin with the host to minimize the cost. But free of charge is unlikely. Grateful if each of you can pay me back $50, that's better than nothing. I'll bear the remaining cost>_<
* I think I did ok in the final in today. Hoping for good news next Monday.

事但up

* 正在公司吃薯片，今天是星期六。答應了阿Da去試姊妹裙都要失約，即刻被串份人好有交帶！！

* 會否冇得claim OT呢？已經連續開夜車好多日了，皮膚勁爛

* ……今天是星期四！由上weekend開始忙到冇停過，打篇Blog都要一個禮拜，痴晒線~~~發癲會之後又有一連串覆文要reply，從未試過如此討厭公司的層層疊架構，何解一個覆文要N個單位去approve呢？

* 俾十萬個部門狂追，shit shit shit，唔想接電話呀。A大姐究竟幾時睇完？

* 忙到今日final in都要改期，唉，雖然恆記那份工只係so so，不過我還未決定好，視乎個package啦，始終保險BM（唔駛跑數）唔係我首選。Anyway，聽日我會盡全力的

友的近況

終於有（工作）時間寫關於一個我很重視的人的近況。常在想，究竟有什麼方法可以令人開心點呢？一向善於整古做怪逗人發笑號稱無聊天后的我，除了拍拍頭，一個擁抱，陪他說說笑笑外，真不知如何幫他。很想為他做點事，怕長此下去他會變得對任何人和事都無感覺，成世人就只是為生活而生活…希望我愛的人懂得享受人生，可以從生命中細微的事上得到滿足。你從小已不是個快樂的人，對著你我常有心痛的感覺，會不自覺地想對你好。現在的你好像比以前更沉默了，即使外表看不出來。我會知道是因為你告訴我，但我有預感你會沉下去，直到完全不想與人說話…很擔心很擔心很擔心…除了更努力維繫我們的關係外，我還可以做什麼呢？有段時間是有好轉的，很喜歡那時會搞笑的你；但入了地獄後，我好像在跟機械人說話，你變得比以前更深沉了。點算好？我需要100個尋找快樂的方法

這個星期，即使再忙，我都想見你。即使安慰人從來都不是我的強項，我只想捉著你的手，去證明我還未失去你這位好友，可以嗎？

型格婚禮

昨晚和B小姐談了很久，不甘寂寞的我極力游說她搞大個wedding party，「大」的意思只是marching-in時放吓紙炮，或者有d live music，但都被reject了，好友（及她的老公）真是一個簡約至上的人。無伴娘兄弟姊妹，無speech無rundown無powerpoint可能連影相環節都冇，有的只是摰親好友最真誠的祝福，這是一個我很期待參加的婚禮。親愛的友，看著你讓我明白到什麼叫「平凡是福」，做任何事都是隨心而行，悠閒的生活態度像你家的貓（所以上年大板怒買之旅真是辛苦你了），到人生大事亦如此低調....這些年來，你都是你，一個容易滿足的人。
如果可以，我想學你。快樂變成唾手可得，那該有多好？

P.S. 期待你的vintage wedding dress，還有紅色的型格裙“誇”

工作二三事

一向很少提及工作，因為沒什麼好寫。工作不忙每日尚算準時收工（7:30前），性質只是不斷審批設計及文字稿，間中搞下function，一個悶字，看我現在狂發文就知我冇野做了。在這間公司做不是不好，只是時間一長個人會變懶，適合已婚或退休人士。有時會懷念以前在匯豐拚搏的日子，雖然辛苦但感覺充實，每日都會遇到好玩的人和事。冇career-mind的我對人工也不是亳無要求，只要不是做古呢洗廁所之類對自己冇value-added既野，基本上我是不介辛苦的（當然人工相對要高番d）。最近亦有搵other industry如FCMG、event mgt相關的工作但音訊全無，政府工有申請紀律部隊但我只是想迫自己減肥啦，我份人咁無紀律萬一真係得左就搞笑…重點係番工要著土爆制服完全唔啱我百變既個性！（但人工真係好吸引）我有機會為香港市民服務嗎？？？

唯一興幸係我的同事們全都是好人，冇咩競爭；小白更是個無架子的絕世好老板，那天若要離開，我會想念她的；A小姐是我的親密戰友，一齊搵食；還有E媽超搞笑，現在轉了座位間房即時冇晒生氣；張大少比女人更感性，好啱傾（此人亦是我及A小姐的姊妹）

不知不覺，已在這兒工作了兩年多，我想是時候認真考慮去留了。

還有心跳嗎

發現時間真是治療失戀的良藥，現在聽到有關他的一切，已沒有那種突然掉進黑洞的感覺。生活如常，番工放工與友嘻哈又一日，會認識新朋友，這種生活過得還可以，簡單來說就是無目標。知道不可長此下去，過往有他提點我做人要怎樣怎樣，現在只可靠自己，畢竟人是獨立的個體，無論有多愛，沒有人可以永遠陪伴對方，最終都是要自己去面對。由長期患公主病直至現在對愛情已有點灰的想法，不能說是好事，但至少上了一課：有問題要面對，拖住對自己（特別係女仔）冇好處。

然而，心好像很久沒有為另一個人而跳動了，應該說，找不到有興趣去了解更多的人。做朋友不難，要讓我覺得值得花時間去keep on就很難，條件不是重點（ok，條件是部分啦，中女不可能開口埋口仲講愛愛愛），感覺才重要。這段時間不是沒有條件挺優的男子approach，只是感覺不對，冇FEEL冇heart beat。有可能他為我做的事能感動我，相處亦很開心，但硬是欠點什麼我說不出來，總之知道他不會是那個人。“Choose a man is like choosing a diamond. The right one is the one you won’t let it off your finger”不知從哪個blog上看到，大慨是這個意思，講出我的心底話。

看來，我的愛情觀仍然維持在遇見他的那年，只是見個面就會不自覺心跳加速的23歲。

週末(二)

父親節的慶祝節目是一家人在30+的高溫下行山，時間為下午3時至5時！先去了Timesquare飲茶，再搭車上山頂，用了1小時行平路（即舊紅屋餐廳旁的散步徑），之後就行大斜路舊山頂道。記憶中很久沒試過家庭活動了，我猜爸很高興我們提議一家人出外玩，比買份禮物或食餐飯更有意思。

回程時，妹說我要快點把自己嫁掉再進駐曉峰閣，那她就可以上我家整甜品？！為何妹會睇好我可以嫁入豪門呢？這個發財夢會不會太誇張了？重點是，嫁唔嫁得出都成疑問囉！

週末（一）

為慶祝好友E小姐生日，我們今年決定豪番餐（唔要再食泉章居嘞），去Shangri la Cafe Too食buffet。四個女子都30歲了，仍然小姑獨處，灰爆。出嫁最有望的A小姐，迫下迫下又好像有些進展。其實只要她放棄華麗的婚禮spotlight及一定要做女主角的堅持，隨時可以嫁人；E小姐重操故業，瞓身發展公關事業，究竟每年她的生日願望有沒有包括想找個男朋友呢？V小姐愈來愈有女強人的架勢，北上發展如魚得水，住獨立屋，完全沒有適應不良的問題。何解我的朋友們又叻又有目標，我就廢人一個只是想找人拍施結婚生仔？

故當晚化悲忿為食量，鯨吞4隻龍蝦加9成以上的甜品，生積嗎我？又偷了2隻甜品碟及小巧精緻的甜品杯，口腹及物質皆得到滿足。好友們碎碎念，不肯與我同流合污…

付錢時拍下大家的銀包。那個超巨大的仿BV銀包好嚇人，一個等於我們三個，若被打劫可用作磚頭反擊劫匪。

與好友過了一個愉快的晚上。E小姐，生日快樂！

健康生活

無啦啦病了，喉嚨像被火燒，吞口水都痛。今早看醫生，隔鄰的中學生發高燒至103度又狂咳，好驚！現階段不看醫生驚，去看仲驚，邊個知坐在診所內的病人是不是確診者？從來我都是健康寶寶，這次同事從Bali帶來的脆脆花生真是太可怕了，吃幾粒即時中招（還有上星期天狂吃吉列炸物，唉，真是人間美食/萬惡的根源）。不過，友說我的聲音變得很sexy喔，說話陰聲細氣的，給人感覺像個溫柔的女生？！我原本就是斯文又乖巧好不好！

上磅發現重了很多，好像愈減愈肥，damn！一定是最近出街飲食太多了。我決定要：
（1） 少吃carbo；
（2） 每日早起30分鐘跳Bollywood dance；
（3） 一星期最少打badminton一次；
（4） 星期六跳Funcky dance；
（5） 如在11pm前回家，落樓下跑步45分鐘；
（6） 睡前用阿仔教的方法做50下situp

給自己3個星期回復番98磅，不靠食藥（我唔要再爛面嘞），我相信會成功的，之後體重保在持100磅內就很ok了。阿Da的婚禮個個姊妹都咁靚，我不可被比下去！

近況

* 懶於更新, 主要是因為工作突然變得很忙, 沒有時間打blog (對! 我只會在公司做私人事, 還有, 用家裡的"小白"打中文不方便呀)。

* 好out地現在才開始看"敗犬女王", 有代入感, 但相差八年的姊弟戀本人是接受不到的. 仔性格上其實有點像男主角(笑!) 另, 我很喜歡女主角的敗犬頭. 雖然喜歡她的髮型，但在感情上我應該不會成為敗犬吧？

* 週末去Hightea、逛街、看CoCo Chanel、吃住家飯 / 出外吃炸炸吉列海鮮，很港女的生活。與親朋好友風花雪月一番，不是挺開心的嗎？但為何我要看林夕的「原來你非不快樂」去開解自己呢？

* L不在港，仔又自顧不下。最了解我的兩個人都不在身邊，情緒有點低落，但又未去到要找人談。嗯，心情像近日的天氣，陰天，間中有陽光或發神經地落大雨。

*方向未明，還須高人協助，希望A大師可以為小女子指點迷津吧!

一路好走

(一)
仔，你安心去啦，姐會為你祈福的，希望你年尾可以有手有腳出獄。畢業那天我想觀禮呀，並會為你獻上鮮花！嗯，台上獻吻就要視乎環境啦，你敢玩我實奉陪，呵呵呵~~~ 另外，我期望出獄後既你：
* 有鋼鐵般的完美身形（不過唔駛去到Wolverine果個級數）；
* 反應敏捷，離遠10尺見到小強都可以即時消滅佢；
* 出街唔好下下大聲話自己係差人，我只係平凡OL唔想增加被攻擊既危險；
* 唔好成日問侯我阿媽又dil又小etc etc…我係一個會講「一般」粗口既Lady，不過唔代表我鍾意聽。總之唔好太過份就ok

其實，無論如何改變，在我心中，你依然是我重視的弟弟。

(二)
L，喜歡吃豬肉的你，在那邊有無被隔離呢？走了這麼久才問，中了H1N1的話大概已經死掉了！！

只想告訴你，那天我很快樂，記憶中我們好像從未做過如此浪漫（我認為）的事。你的溝女技巧很好呀，為我這個老朋友尚且如此花心思，才子你應該可以lum盡天下美女（笑）。

回來後，找天我們再去美利樓吃飯吹海風看日落吧！

To my brother

到底要痛到何時呢？已經很久沒有真正大笑過了，只是斷斷續續地哭。自以為心中那個洞已經填好了，原來它還在，沒有人扶持，我好像又掉進去了。不能永遠依靠別人，尤其是那人已幫了我很多。這幾個月來有你的陪伴，無條件做我的精神寄託......你並不是我的水泡，而是我重視的知己。或許開始時，我將對他的關愛轉投在你身上，努力地想爬出那個無底洞；後來發現了你的真，是絕對值得我把心交給你。儘管不能成為男女朋友，換個形式，我選擇以對家人的愛來延續我們的緣份。失去了多年的感情，換回一個一輩子的弟弟，很值得。你提醒我要細想自己的人生目標；要了解自己的優點缺點；要明白什麼才是適合自己；要用眼及心去看事情；還有，要多思考少發夢......這些不是沒有人和我談過，我只是沒有放上心。
我能回報你什麼呢？學習你的堅強，努力做好自己再重新出發......你會一直在我身邊支持我吧？

姐

事但up

發現事但up系列好像愈寫愈多了，因為生活中並沒有太多值得我記下的人和事，只有零碎的日常點滴。我的寫作靈感源自於喜歡的感覺，尤其對人。感性的人亦會有理性的時候，太習慣依賴另一個人並不是好事，即使那種依賴是短暫的，我不想為戒毒而去食另一種毒。嗯，這樣說他好像不對。對我來說，他應該是古古力加維他命的混合體。如果可以我想日日吃古古力，但我冇quota消化晒喎，所以間中食一兩件好了，好食的東西通常都不健康；維他命是supplement，可以每天吃，但絕不能當正餐。若單靠食維他命吊命，第日間藥廠停產就死梗啦！還未找到一間可以食足三餐的餐廳前，我是否應該留意食維他命的份量呢？太有營養我怕會偏食（或者唔想食正餐）囉。

上星期六去了Yamm，最開心不是因為怒食甜品，而是偷了一對靚甜品杯！偷來的滿足感覺是買野無法比擬的（愛情除外）。

快樂事

我是個很易滿足的人，生活中很細微的事都可以讓我樂上半天，例如：

* 自己塗指甲油，別人會問我在那間鋪修甲及上色（即是代表我油得漂亮）
* 購物後，無論只是在淘寶網買A貨或是去LCF買鞋，都很滿足
* 在試身室內拍照但一樣野都冇買，會很proud of自己的管束能力
* 與自己喜歡的人吹水廢up無聊事亂說一通，可以是傾電話、食飯或飲野
* 週末睡到自然醒，但有人morning call亦覺得挺sweet的
* 看看書，邊聽CD，用漂亮的英式茶具喝伯爵奶茶配手製餅乾
* 隨街拍下有趣的snapshot
* 皮膚有改善，體重變輕
* 陪家人食飯，全程沒有吵鬧（我要求很低的，只望可靜靜地吃飯）
* 看電影、看歌劇、看芭蕾舞、看展覽
* 去旅行、去散步、去跑步，去打球
* 吃古古力（雖然事後會後悔，但吃的時候很滿足）
* 諗計逗朋友開心
* 看著滿房的Elmo擺設，會打從心底笑出來

還有很多很多小事…..最最重要是，心境開朗，做什麼都會覺得快樂。

有趣的發現

與相識不久的朋友言談甚歡，意外發現他的某種特徵跟我的ex一樣! 指的不是外型上的相似，而是很細微的性格及想法，初認識是不可能知道的。那麼，是否代表潛意識裡我們傾向被某種特性的人吸引呢？但從年齡背景等因素看來，他們是火星人及地球人呀，完全不像。所以談到新朋友對人生目標、生活態度等想法，竟可以與前度如此近似，我都覺得很神奇。這可解釋為何我會這麼快就接受了新朋友為交心的知己好友嗎？！

其實，真實的我，是個慢熱的人(雖然看來唔似)。

原來

原來, 你還記得我曾在早上3點鐘morning call你起床讀書; 記得我曾休假半天特意與你食lunch, 只為你在前一晚提及有點想我; 記得我在黑暗中輕吻你帶笑的臉, 你說我的眼睛像星星......原來, 你還記得我對你的好

又原來, 我還是很想你

仔, 對不起, 你一定對我很失望吧! 可以借你的堅強給我嗎?

事但up

* 完全冇心機update，好像做什麼事都提不起勁，我是否提早步入更年期呢？

* 聽完昨晚的電話更加火滾，他到底想點？現在我還不夠PK嗎？扮晒關心，有用嗎？ !@#$$%%^^&&**** 忍住沒有發癲狂鬧，要保持形象。

* OK我是有點失控，其實並沒有恨他，今晚我會打給他的。

* 唉~~~對住好友半夜爆粗，勁樣衰！朋友是沒有義務受我氣的。V，你實在對我太好了 ^^

* 有時想，不如任性地事但找個人算了。

* 現在的我好像迷失了方向。不過，咁大個人應該要學習處理好自己的惡劣情緒，給我多一點時間吧！

煩煩煩煩煩

為什麼在公司裡是沒有秘密的呢？為什麼大家都那麼八卦？？為什麼會認為介紹人與被介紹人不會介意全個部門的同事都知道此事？？？工作真是苦悶到要周圍同人講嗎？？？？

不是在怪責其他人，我只是嬲自己而已。

再次向同事E及另一個部門的同事A致歉

投緣這回事

十萬年沒有更新了，又不是很忙，搞咩呢我?

最近做了一件令朋友開心的事，新識的朋友喎（少過半年），想來真的有點不可思議，我一向只會對相識N年的知心好友多花心思。有時我對人是有距離感的，嘻嘻哈哈後大多不會主動聯絡對方，其實我是自閉的宅女！這位好友呢，好奇怪地不知什麼時候開始混熟，晚上勁講電話（內容很廣泛，日常工作感情SEX家庭立立雜咩都有），閒時一星期見面一兩次（比拍拖時見男友還多）。唯一可以解釋的是，我與他十分投緣，很自然就會講出很多自己的事，善於與人溝通亦是他的優點之一，特別係對女仔啦！有時覺得如果家裡有個細佬像他會很好呀，性格獨立做事貼心，又會做飯給姐姐食！！呵呵，其實我妹都經常照顧我呢，我做家姐很失敗，只會負責搞笑！

友情與愛情一樣，都需要花時間維繫。我覺得這位人兄是可以交心的朋友，已經被我劃入5大異性好友之列。須知道要上榜一點都不易，要經過長時間相處（嗯，有2位是前度男友），朋友仔一來就上榜，可以想像他有多了解女性（即係話：溝女技巧超高）的想法吧！有冇人想應徵做他的女友呢？

有緣與你相遇相識，我覺得很開心呀！但願你可以早點找到那個她，那我就可以放心了。（噢我真係好似當左佢係細佬囉，幾時開始變得咁有愛心呢？）

事但up

* 周日去了看演唱會，近距離見到方大同。雖然佢個新 “公仔面” look勁唔得，不過邊彈琴邊唱love song既佢依然lum到暈。有方大同既地方就會有Fiona，佢地真係好match，方大同寫既歌由Fiona來唱，總有種甜美的感覺。

* 周六晚飯後和R散步去，感覺像昔日我們拍拖的日子，閒話家常。問及我有冇對像，我老實答他沒有…他說希望看到有個人可以照顧我。聽完後沒有特別hard feeling，心裡很平靜。

* 好友D的故事令我很心酸。朋友，我擔心你愈採愈深，他最多只會視你為知己，沒有結果的(雖然他是個好人)。。如果這就是你想要的結局，我只有祝福你，但可否嘗試給自己另一個追求幸福的機會呢? 你是一個很好很好的女子，值得有個愛你的人陪伴你終老，而不應該是一個會照顧你但不愛你的人呀！多為自己設想一點，可以嗎？

* 有幸試到朋友仔既手勢，唔知喜歡他的眾多女仔會否羨慕呢？不過如果有下次，我諗都係我煮會好d囉，一路等一路驚個廚房會爆炸！！謝謝V的招待及有用的溝仔建議。另，你心情好點了嗎？

還是好朋友

R，生日快樂，送你一首我很喜歡的歌：

還是好朋友 比愛人長久
不能牽的手 按在心頭
在最寂寞的關頭 永遠在左右
事過情遷後 昇華眼淚後
思念是最漫長的享受
是什麼叫你我，只配做一對 好朋友

生日快樂

妹妹, 生日快樂呀~~~~今次幸好沒有整蛋糕, 只是整了Fruit Tart / 3款muffin / cranberry scone with MO既rose jam(果張影得唔靚冇放到上黎), 你honey都整晒愛心蛋糕俾你啦! So sweet!!

很久沒有一次過焗那麼多東西了, hope u like it ^_^

原來我看來很港女

與朋友仔的一段話，再次了解到，愛情(及婚姻)不外乎是一門生意，講求包裝，以迎合不同的target audience. 記得很久以前曾有位好友說過類似的話，當時的我很天真，覺得扮來扮去都是多餘的，他就是喜歡原本的我啦。已經喜歡上了，哪麼顯露多一點真性情還可以；但如果是新認識的，包裝(指的是外表及性格)是必須的。以買衫為例，有件衫易襯價錢平，照理應該會幾搶手，但window display出來的配件全都是名牌，俾人的感覺就是全部都很貴，如果不是target高檔市場就大問題了，就算件衫幾抵買都冇人知。

即時訪問了新舊朋友，竟有以下發現：
* 我看來像 * 其實我係
* 大小姐 * 打雜妹，會做家務煮飯吸塵洗廁所
* 太子女 * 窮家女
* 唔可靠 * 唔敢話「交俾我一定掂」，但會盡力做好本份
* 購物狂 * Money-wise，會睇餸食飯，冇錢點買呢？
* 買貴野 * 買一件貴野mix & match with平野，其實成身好cheap
* 唔專心(花心?) * 搞錯晒！！喜歡新事物只係好奇啫，唔代表花。我容易仲意一樣野(或人)，但要愛上就很難

何解差落會這麼大？我給人的印象就是100%港女，灰到爆！未做訪問前我只覺得自己是個普通的中女，有點愛美，(有時)有點任性，但個feedback好negative ~_~ 真的要認真想想怎樣重建我的品牌形象，沒理由自己做marketing的包裝技巧會咁差。

下次再談我的市場定位及宣傳推廣計劃。特此多謝朋友仔的保貴意見 ^_^

另，網誌已經改名為慳家(不是敗家)日誌，敬請留意

愛情專家

昨晚與好友D閒談，大小姐她一面lum爆的樣子，好好笑(對不起，平日的你太理智，好難想像因為某君突然打電話給你就面紅耳赤)。如此年紀尚有少女情懷，證明你對愛情仲有憧憬，唔該唔好成日扮晒cool話我低能諗埋d無謂野喎，你都好“cute”啦！無可否認有時我d橋係lum到仔既，你覺得好唔型，so wat？Work就得啦！適當的時候，女人都是溫柔d比較好(某君好buy你束愛心花就係一大證明)。

不過呢，能醫不自醫，我如果真係掂就唔會散啦！D是我認識的朋友中屬於少數冷靜機智型的，常對我夢幻式的想法很感冒，永遠都是毫不留情向我潑冷水。其實相當慶幸有這位好友的提點，做人太樂觀並不好，有她“到肉”的批評做心理建設，就算結果未如人意亦不會太過失望。我是個很重視別人意見的人，可能因為份人無主見(即係冇性格，R講既，唉)。講開又講，分開後，和他的關係反而更像家人了，什麼事也會談(err，溝仔我唔會同佢講囉)，溝通比以前多了，但好像.....完全沒有了愛情的感覺？！是否代表我已經完全recover晒呢？

另，攝影真的幾好玩，target 4月前買部入門單反，不過3月份都有很多計劃內的支出呀 (學Thai Box同日文)。D / R / G，你地快d俾tip啦，等錢駛呀

寫blog的意義

一個我常去的blog close down了，第一時間想到：又邊個PK玩人身攻擊？搞到網主心灰意懶永久閉blog？雖說人人都有權發表己見，寫得出街又唔刪除留言function就預左俾人講，但寫blog本來就是很個人的事，為的可能是與友(朋友或網友)分享生活上的趣事，又或當是寫日記留給自己作日後回憶(我就是如此)。開開心心風花雪月一番咪幾好，現在因為少數搞事分子弄得一拍兩散，俾我都會覺得為什麼要受氣，不如唔好寫了。

素顏，我深信有99%你的讀者都是支持你的，最重要就是令自己快樂。雖然不認識你(不過我曾在吉之島超市見過你兩次呢)，但從交字間可以感受到你是個爽朗樂觀有生活品味的女子，我都偷左師 -->“屋企煮”系列lum仔勁得！“出街食”是我的飲食指南(特別係响鰂魚涌區)，還有，林積積真係好鬼cute！希望你日後開開心心，早日搵到Mr. Right(嗯，大家咁話，我都係啱啱散左幾個月)。

兩大常去blog的其中之一沒有了，ZZ千萬不要閉blog呀~~~~~

事但UP

* 最近心情麻麻，可能是因為小白走了。其他的…沒有什麼想update。

* 送走小白的那天，淚灑旺角街頭；晚上打邊爐後看了相機內小白的照片，又在朋友面前狂哭；睡前看到房內小白的玩具，又喊；早上起床聽不到小白的喵喵聲，唉~~~整天都眼紅紅。只是短短一星期的相處，為何會如此喜愛她呢?

* A說我「交收」小白的情景活像對分手情侶：我地分手了! 還番隻貓俾你!! 女的當街當巷狂喊，男的就拎住隻貓，長揚而去?! (其實都有d似)

* 與家人(指父母)的關係去到冰點，已經很多天沒有說話了。本星期我安排了緊密的行程完全不會在家吃飯，盡量減少見面的機會。等心情好一點，我會回復正常的，現階段真的不想再因為小白而吵架了。

* 任性的我，這次的確做得不對，I’ve no excuses. 不過呢，是時候認真考慮獨立了。萬分懷念在Toronto讀書的日子，自己住，可以做任何喜歡的事

* 搬出黎住首先要慳錢，華衣美服可免則免。嗯，OL敗家日誌可能要改名為慳家日誌了

小白的生活習慣

想珍惜與小白最後的相處時間，所以推掉了本星期的所有約會。一向極怕肥的我連跑步跳Bollywood dance都無做，一放工回家就是與她玩，草草吃過晚飯後，又繼續玩，很有「揪女」feel。

玩樂：
通常一開房門，小白就會喵喵叫，沿褲管或絲襪往上一路爬到近腰間的位置，再咬住衣服唔放，勁搞笑。玩完爬樹遊戲，我又會用羽毛棒逗她玩到“典地”及 “反肚”，她會癲到四腳齊舞，用牙仔狂咬我的手指。另一個令小白發癲的遊戲當然是「飛天小老鼠」啦，她會好激地玩到撞反食物兜。

睡覺：
當小白自動爬上我的大腿撒嬌，輕輕地抓著我的衣服不放，即表示她想睡覺了。試過將她搬到士多啤梨屋內，她又會馬上醒來喵喵叫，要睡在人身上才安心。這幾天我都是抱著她坐在地板上睡了幾小時，或將她放在大腿上一邊上網。一般情況下小白都會很乖地睡在屋內，但昨晚呢，一腳踏上阿妹個頭，又喵喵叫要和我睡啦，結果她玩得太開心，被窩暖立立......唉! P左嚮我張被上囉又。

食野：
特登買了幼貓Canned Food同埋Bestseller木魚小食，但小白似乎唔buy

廁所：
比想像中理想，完全冇味，木貓紗真係十個好用

小白咁得意，我仍然非常極之喜歡她，搞到間房7國咁亂都冇所謂。今晚會否有轉機呢？Godma講一句好過我講100句，阿媽會唔會at least可以了解下我點解會想養貓呢？

小白喜歡的幾件事

* 「飛天小老鼠」
* 抓褲腳當樹咁爬，仲有抓人腳板
* 玩拖鞋，特別係咬膠拖鞋，毛毛鞋仲意「捐」入去
* 在辦公室轉轉椅的椅腳上「琴高琴低」，再在地毯上滾來滾去
* 爬(及咬)士多啤梨屋，在屋內反艇
* 睡在大脾上，貓樣向天，手腳申直
* 玩膠袋

我還有時間發現更多妳喜歡的小事嗎?

繼續食食食食食

生日週的飲食記錄：



* 星期一：中午開年飯，「寧波」上海菜包括鴨舌、蔥油餅、醉雞、薰鴨、薰蛋、黃金蝦、豆苗、高力豆沙......晚飯日本菜有sashimi、炸物、魚湯面線、Pork+tofu鍋、吞拿魚handrow、綠茶ice-cream加曲奇。I AM A DEAD PERSON!! 謝謝V請客。
* 星期二：中午飯，公司飯堂吃了糖醋魚塊、冬菇、白飯兩啖、黑豆漿......晚飯去Outback，為左食份量超大既免費Chocolate warm cake(又係古古力!!)。謝謝D請客
* 星期三：中午飯，Mandarin Oriental食light lunch，(好似)健康到爆，但食埋個signature dish chocolate truffle >_< ......晚飯去了近家酒店的高級中菜廳(原本是想去Timesquare某中菜廳吃賣相精緻的外省菜，點解生日都冇得話事呢? 唉)，還有阿妹整既靚蛋糕(又係古古力，help!!!)。好好好，肥都食晒佢ok? 謝謝A及家人請客
* 星期四(預期)：公司部門午宴，隨意吃，不值一提......晚飯如無意外又係食日本菜，想去「一門」。F同Baby應該會請我吧? (非常老實不客氣)先謝過啦!
* 星期五晚(預期)：打Badminton，會食得清淡d，總之冇宵夜(啩?!)
* 星期六晚(預期)：會去中環某中菜廳，識食朋友推介，應該好味(又係食中菜，不是因為我喜歡，只是按營養師的要求多吃飯及魚啦!)。很久沒有與V / B / A / E吃飯吹水了，謝謝大家俾面呢
* 星期日晚(預期)：泰國私房菜，萬二分期待!!

差不多餐餐都有古古力，大家真係太愛我了. I’m done with chocolate (at least for a while)

ZZ常說，食物好吃與否並不重要，能與喜歡的人快樂地邊談邊吃，才是重點。雖然人老珠黃(灰)，要俾人叫姨姨(唔可以自認姐姐了)，不過今年生日過得很開心呢，Thank you to all my friends ^_^

食食食食食

新年例牌大飲大食，個肚大到似就快生得。踏入生日週，情況更一發不可收拾。

先看看我新年的飲食記錄：(只係計SNACKS，我仲有食齊中午/晚餐)

* 初一至三：紅豆糕、馬蹄糕、年糕、椰汁糕(全部加埋食左唔知幾多塊)，手工曲奇(明明話整俾人食，自己為左消滅d樣衰既，又食左好多)，古古力(偷食)
* 初四：晚餐跟足醫生指示食魚片粥加菜心，不過打完波之後食左兩件蛋撻做宵夜，shit~~~~
* 初五：冇食snacks / desert/ 宵夜，因為食晒「碗屋」全份set lunch(天!!我肚生蟲嗎? )(注: 份量係一個正常食量既男人食完都會覺得飽到想嘔)；晚餐好飽。Btw謝謝S請客啦，下餐我既
* 星期六：夜媽媽食蛋糕+豪飲，俾面派對避無可避。人老左，通一晚頂就病了，唉~~~~
* 星期日：怒食古古力 (嗯，因為生理因素啦，不過又實在食得過份地多，紅茶味Kitkat好好食，仲有嘉頓原味及橙味古古力手指，好懷念呀)

又，一個人究竟會否因為食得太多古古力而膚色變深呢? 我小時候以為是會的。

Benjamin Button vs 波兒

近期看過最令我感動的電影，必定是The Curious Case of Benjamin Button，久久未試過在戲院內哭了(even 看P.S. I love you我都沒有喊，只是悶到想睡覺!!). 十分之認同橙小姐所言，又是關於緣份的問題：Benjamin與Daisy的一生相聚又分離，小時候的兩小無猜；二十多歲時各有所愛；三十多歲時相戀，結婚，生孩子；之後男的離開，女的改嫁；到Daisy五十多歲時他們重逢了，依然相愛，無奈不可能再走在一起；最後兩人終於可以相守，但Benjamin已經記不起Daisy了。這是一個很sad的故事，看完後心情沈澱澱的，之後一整天都提不起勁，一下子對愛情充滿了悲觀的想法(?!) 相愛，但無法相守，是timing的問題。有時想，他出現的時間太早了，如果遲一點才認識，大家的經歷多了，思想成熟了(指的是我啦，過左30歲之後個人會否識諗d呢?)，我們會有個完美的結局嗎?

看了崖上的波兒。故事簡單，節奏明快，看完之後很開心，波兒又超可愛(期待V小姐送我的生日禮物，嘻嘻)，小孩子的感情從來都是簡單又直接，不過5歲人仔究竟知唔知道愛情是什麼? 怎麼說呢? 不是不好看，不過和Benjamin比較(兩者皆是超現實的故事)，前者給我的感觸極深，波兒對我來說就只是一套宮崎駿的動畫(故事喻意比之前的作品更淺白，我收到的msg是海洋污染，同埋愛要勇往直前?!)。我應該是buy喜劇的，唯獨這次，若有朋友問我近期有什麼好看的電影介紹，我絕對會推介Benjamin Button。

另外，Brad Pitt當然是勁靚仔，變回後生版的金髮look直頭同N年前既Meet Joe Black一模一樣!! 我同阿妹都睇到哇哇聲~~~~Cate Blanchett又係靚到dump一聲，好有氣質......其實佢係咪真係識得跳芭蕾舞呢?

新年行大運

牛年不展望順風順水(因馬仔今年依然帶有上年犯太歲的黑氣), 最少不要像往年般黑過鑊撈......

另, 祝新朋友S先生生日快樂, 希望你順利"達標"啦~~~~應該不會太難吧?!

相信緣份

看了素顏之前有篇關於擇偶條件, 又試寫一下(但我不是徵友喔)

外表:
* 不要比我矮(指的是沒有穿高跟鞋), 我是個只有5尺2的小矮妹
* 正常樣, 順眼, 不用太靚仔. (我已接受了我與靚仔是沒有緣份的)
* 嗯, 跟據各前度男友的樣子, 我應該好buy眼鏡男, 感覺好有智慧?!!
* 忌肥仔, 肥得黎夠cute夠精靈除外
* 不要比我窮(天知道其實我經常生活在赤貧邊緣, 千萬不要以為我是有錢女呀)

性格:
* 沒有特定, 能溝通就可以
* 懂得照顧人, 如果要我take care人.....會係一場災難囉
* 最好叻過我, 可以教到我野(這項不難吧, 好少人會低能得過我)
* 有少少藝術細胞會加分, but not a must (其實想同佢玩吓flute+piano duet, 同前前前度試過, 突然好懷念)
* 節儉 --> 係, 你冇睇錯, 我想要個識得慳錢既男友. 我唔會choose someone love shopping like i do (富豪除外)
* 至於浪漫, 有就好啦, 冇都ok, 因為我會自己黎, 諗無聊野係我強項
* 可否不要太注重身材呢? 我係小朋友(指的是身軀, 思想都算係大人既)

我不算太港女吧?! 常覺得自己有expectation, 反之其他人亦一樣會對我有要求. 將心比己, 自己又不是上菜啦, 又一把年紀了, 定位不能太高, 必要時要"減價促銷"?! OK~~~離題了. 我想說的是, 把口成日講話要快快找個男友, 其實又不是太積極, 友說有時我還會倒米!! 將自己最差的一面表現於人前....well, 要扮野, 我絕對冇問題, 只覺得扮都冇意思, 要為迎合另一個人而改變自己....I just want to be myself, that's all. (當然有時我都可以很體貼的!!!視乎有幾愛啦)

人生會遇上很多人, 亦可能會喜歡很多個他, 但能與你走到最後的, 必定是與你緣份最深的一個. 分開了, 不是不愛, 可能只是因為緣份不夠 (所以我不會嬲你的, 不要太介懷了, 我現在很好)

我, 相信緣份, 期待下一個他的出現.

LB朋友仔

終於可以回歸原單位, 起碼暫時不會再有那種日日想請sick leave, "點解要為左幾皮野torture自己"的感覺. 數個月來學到的就是 -- (1) 俾工頭鞭屍都死忍; (2) 唔好成日睇錶等收工; (3) 當自己係部人肉機器不停出貨 (4) 睇file睇到迴光返照就做同事A教既健身操. 是次事件又一次確認我就算瞓街都不要做call centre, 如此刻板的工作真的不是我杯茶囉.

不過呢, 能夠認識到一班來自不同部門的同事絕對是意外收穫. 因為他們, 我的笑紋深了很多呀, 又成日笑到橫隔膜都痛埋, 很久沒試過在辨工時間內玩到咁痴線!!
* 同事M: 大姐大, 撕紙皇后, 偷拍快手
* 同事P: LB地獄中最kawaii既女仔
* 同事S(高瘦版): 我減肥既終極目標, 食極唔肥.....想打人呀我
* 同事A(大)及SY: 超級caring, 很有媽媽的感覺
* 同事D: 歌神上身, 識唱晒古今中外既歌, 型爸一名
* ex同事V: 一句講晒, 型!! 被某中女(師奶?)明戀的對象. 喂, 我想將你幅靚仔相擺上素顏個blog度呀 --> http://fullofhopesornot.blogspot.com/
* 原單位同事C: 少爺已經被我upgrade變左做絲士打, 減肥良伴
* 原單位同事A: 以你我既交情, 無須多言, 大家心照
* 同事S("壽司版"): 多謝! 你係我每日上班的歡樂來源, 沒有你, 我是撐不到現在的.

Best of the best.....登登登登......

(因為私隱條例冇樣睇, 不過淨睇S既手勢都知佢掂啦!!!)

期待我地之後既gathering, 駛唔駛代V誠邀壽司S出席呢?

事但up

* 正在等同事A, 大小姐她需要時間畫眼線查眼影粉底blah blah blah, 已經用左15分鐘仲未畫到一條滿意既眼線囉. 想點呢?

* 等待期間拍下的無聊照片, 都是不能拍出理想的效果. 很想玩專業機呀!

* 我地今晚係有特別任務, 嗯, 之後再做賽後檢討. 好友都心急想知道詳情, 我今晚要打俾兩大軍師報告戰果添

* First day番原單位工作, 唉, 好yim悶, 暫時又係未有大project搞.....

* 大小姐終於搞掂, 要走啦....嘻嘻, 有少少緊張. 遲d再update

後記:

* 感覺係好似interview, very tired

* 非常認真地"寫筆記", 相比A的notes, 我俾自己10個勁!! 上LLB又唔見咁落力drop nts噃.

* 之但係我只係A既陪嫁妹仔都咁上心, 絕對係"我會做好呢份工"既人版.

* 大概只係記得4~5個左右啦, 好多Finance人囉, 有特別原因嗎?

* 基本上我想認識其他行業的人啦, 做bank既我已經識得唔少

* 俾自己40分, 唉, 講野都係太口沒遮攔. 知道有一個係做dealer既, 狂問人家邊隻買得過? 2628應該什麼位入? 現在是早晨師奶問股市環節嗎?

* stupid左, 我跟足遊戲規則有KO人, 應該要好似A咁全部tick晒YES, 識多個朋友冇壞呀

* 會否一個contact都沒有呢? 如果係, 我要陷頭埋牆或者服毒自殺囉

新與舊

Blue Monday, 天氣太冷手腳冰凍行動遲緩, 又遲到了. 只遲了一分鐘, 早知就唔駛好似癲婆咁嚮地鐵狂奔, 唉~~~~今早地鐵事故特別多, 站站都起碼開關三四次門, 都算嘞; 周圍勁迫人, 都預左; 但係我冇諗過晨早流流睇住一對les"依泣"囉. 番工啫, 點解好似生離死別咁要sweet talk(我直頭企係隔離聽到晒, 唉!), 仲要goodbye kiss(激果隻喎!), 當下我只好企嚮度閉目扮瞓覺. 說真的我對同性戀完全沒有bias, 不過在如此多人的公眾場合表演, 應該要顧及其他人的感受, 特別是我此等冇拖拍的單身人士啦.

琴晚activate了新電話號碼, 舊有的會保留至合約完結為止. 舊號碼已沿用了超過10年以上, 應該是我出第一部電話時用的, 之後去了多倫多亦沒有取消, 此號碼可以說是伴我成長. 友問我捨得嗎? 不怕朋友以後找不到你? 我轉號碼當然是有特別原因(唔想disclose, mostly because i feel like it), 其實要取消舊的我都掙扎了一段時間.....不過這不失為一個清理frd list的方法. 如果她/他個幾月都沒有打電話給我, frd極有限, 我不會當那些"朋友"為true frd囉, 哪麼如果他們在某年某月某日找不到我都冇所謂啦!

不過, 我會將新號碼特別告知我認為是真正的朋友/家人/同事/老細......嗯, 還有幾個有聯絡的舊男友(已經變成frd only). 如果你沒收到我call, 可能是我忘記了, 過渡期間打舊號碼都可以得知我新號碼的.

真正的Shopping Queen

我認為終極shopaholic的定義是不論何時何地平或貴價都可以買. 舉個例子: 會去LCF買正價鞋, 常買的手袋品牌不是LV就是CHANEL; 但又會去大陸買A貨, 隨街買cheap野喎. 與好友P相比,我算得上"慳家", 起碼會等到有減價才會大手掃貨(err.....當然有時很難忍手都會買一兩件新貨的). P令我甘拜下風的地方就是無時無刻都在買東西, 上週六與她殺入北角女人街某成衣出口店, 為的是雜誌上提及20元一絛的正版Juicy牛仔褲, 那種與師奶阿伯在牛仔褲堆中(有幾個人咁高!!)發狂搵野買的狠勁, 購物狂如我都不得不寫個服字. 有個shopaholic frd收風都快d, 間中會有vip/staff discount, 唔想咁敗家但又有佢地自動報料, 究竟係咪一件好事呢?

看上年的開支分佈, 購物(包括衣褲鞋袋美容等產品)占總開支的44%, 吃飯支出只有7%, 可想言之我絕對是愛靚唔愛命, 寧可吃少一點省錢用來買東西. 2008年花錢實在太過分了, 買野的金額....可以用來作一百萬私人樓的首期囉!!(9成按揭) 所以09年的首要目標除了搵個好男人外, 就是要儲錢買樓, 雖然已經講了很多年, 但今次我是很認真的, 萬一嫁唔出都要有間姑婆屋住掛?

老土地要寫寫09年展望(最重要的排先):
1. 找個可作結婚對象的好男人(之後再寫篇關於擇偶條件)
2. 儲錢投資, 首選買樓
3. 父母身體健康
4. 轉份好工
5. LLB考試合格, 我要求很低的

當然還有祝各好友事事順利啦 ^_^

Are you feeling better today?

陪了好友D差不多一整天(除了工作及睡覺時間外), 我從沒見過他這麼down.....希望今早心情會好一點吧! 知道你是個硬朗的人, 但遇上嚴重問題真的不要屈在心裡. 如果是我的話就一定要找人傾訴, 否則人都癲! 阿D, 對不起呢, 沒有可以幫忙的. 我唯一可以做到的就是不問你, 陪你勁食野(天~~今早上磅我重了2ib, 捨命陪君子呀), 講無聊野引你笑, 這就是我的作用啦! 近來我都自身難保黑過鑊lo, 就快連笑都覺得很勉強了.....儘管我只會提供無聊意見(你一直強調這點!!), 無論你與"冰山"的感情或是其他問題, 有需要都可以找我呀, 特別是想狂買東西發洩的話, 你唔搵我搵邊個呢?!

另外謝謝你昨晚請客, 照燒鳳梨很好吃, 下次試做給你吃吧!

事但up

1. 何解父母一定要due check我d垃圾呢? 晚上辛苦清理了一大袋廢紙/叉電器/紙箱等放入環保袋內, 今早出門之前成袋不見了?!!! 救命呀, 個環保袋已經放在床下底幾年用來擺雜物, 勁多塵......親愛的父母, 你們是想退休後兼職拾垃圾嗎?

2. 近期看過的電影(我並不是寫影評)

我的大穫假期: ok幾好睇, 有我喜歡的女主角(但男既完全唔掂囉). 愛情小品is my cup of tea

葉問: 免費睇戲兼有人請食飯, 可以一看(食飯與看戲有關係嗎?). 我仲意睇友人的肉緊反應多d

梅蘭芳: 唉, 黎明好漲呀, 扮唔到梅蘭芳啦. 反而少年版激似黎駱賢既靚仔還可以. 另, 8成觀眾是阿公阿婆, 點解我又會睇呢? 我不是梅蘭芳粉施bor

3. 有沒有人可以與我合唱五月天既"私奔到月球"同埋林峰既"愛在記憶中找你"? 我好想唱囍帖街但點解CEO只得蘇永康版??

父女對話

今天與家人看早場(十萬年未試過禮拜日咁早起身為左睇平價戲), 之後飲茶. 席間有以下精景對話:

女: 我想養貓呀
父/母: 養咩貓呀, 自己都養唔掂, 冇得傾
女: 我同事隻貓生左4隻, 佢屋企已經有太多, 我唔收留隻貓仔就要送俾愛護動物協會架啦(當然呢係我老作既). 白色貓仔好得意架
母: 咪送囉, 幾好呀
父: 養咩鬼養(呢句話重覆講左N次), 屋契寫明唔俾養貓狗, 之前隔黎屋養狗俾人告過
女: 淨係唔俾養狗之ma, 貓又唔駛帶佢落街, 又唔會嘈
父: 屋契寫明貓狗都唔養得, 寫明架(不斷repeat又repeat, 這是老人家的通病嗎?或是冇其他excuse?)
女: 咁你俾張屋契我睇
父: .................都話有寫咯........
母: (開始河東獅吼)唔得, 間屋係我既, 你第日自己住, 結左婚, 想點養都得. 總之你一日仲住嚮我間屋就唔可以!!
女: (妖!有錢一早搬走左啦, 你估我仲意日日俾你地俄咩)我唔放貓仔出黎大廳咪得囉,我自己搞掂唔會煩住你地
父: 而家d後生, 養貓狗, 生bb, 之後又咪又係搵父母幫手照顧, 冇d責任感
女: 都話我自己搞掂咯
父: 生仔要照顧佢一世
女: (因咩事會講到去生仔?離晒題)點生呀?單性繁殖嗎? 而家係話養貓呀, 我知要照顧佢十幾二十年. 養貓好過養人啦
父: 生左個好似你地咁就激死
女: 咪係!! (絕對認同, 我唔係次次包咬頸既) 所以養貓好過啦
父: 屋契寫明唔養得.....(又不斷重覆!!!)
注: 阿妹同其他親戚全程冇出過聲

唔理啦, 我當notify左佢地, 本月底會有新成員加入.......會唔會家變呢? 好緊張!! 如果用失戀心靈空虛depress所以想養貓做借口, 會比較有說服力嗎? (之但係失戀點解同貓有關係?!) 貓痴b小姐得知我想養貓的第一個反應是: 噢, 隻貓好慘呀! !@#$%^&* 原因係佢覺得我份人冇愛心!! (頂吖, 咩friend黎架)

總之, 2009年第一件要做既事就係搞場家庭革命. 睇死我養唔掂, 哼! 我唔會衰俾人睇, 貓仔一定可以嚮我悉心照顧下長命百歲既!

舊情書

我喜歡以文字傳情. 可能是我說話太口沒遮攔了, 又或者表達能力奇差, 很多時說不出心裡真正的想法. 雖然文采一般, 但我喜歡寫情信給我喜歡的人(指的是電郵啦). 有時是分享一些生活細節, 有時只是想讓他知道我的思念. 基本上在電話說都可以呀, 為何要多此一舉花時間記下來呢? 是為了想留個回憶, 就算日後陪伴自己的不是他, 我都不想忘記曾經為我帶來快樂的他. 我可以同時喜歡很多人/事, 除了男友, 我亦愛我的好友們, 同事, 父母, 妹妹.....但在那時, 我最最喜歡的就只有他(他 = 舊男友(們))

文字記錄了我當時最真的感受, 那結束之後究竟他們會如何處理我的情信呢? 會保留或是會刪除? 如果怕新partner知道的話, 我是不介意他delete的, 畢竟已經是過去式了. 我自己呢, 大部分我都會儲存, 曾試過粗心大意地忘了backup, 寫給一名ex的電郵全部刪除了, 當時有想過問他有沒有存檔, 為免引起不必要的誤會, 最後都放棄了. (但之後偶而談起, 他竟然還有留低, 我是有點surprise的)

當然啦, 我是絕對不會給新男友發現這些記錄的!! 多大方的男人都不會完全不介意啦, 萬一發現了(可能性極低, 我好小心處理機密文件的), 我要保镬就要寫得更加肉麻.....i'm not really good at that囉.

正能量

間歇性憂鬱的我, 時常渴望有人扶持. 只須你的幾句話, 便可消除我的心結.

寒風中有你相伴, 儘管手腳冰冷(as usual), 卻暖在心頭, 謝謝你!

找天再一起散步, 好嗎?